قصيدة بلاية وداع لعريان السيد خلف

روحي بيديه وساهرت عيني الليالي أتأملت تلمح خياله
خدوده لو ورد البراري .. خدوده تحمر أبدلاله
وانا صابر وانه ذابل وانتظركلمة فرح منه برساله
وشعجب شحن مكاتيبه علي ومابعد للحب أثر
وك والقلب أه القلب شتله بجزيره ويحلم بمزنة مطر
ابهيده ياشوق العمر ما بينه غربه أشويه من محبتك
من شفه كلمه اريحيه
ولك بالحلم لوليله مستخسر عليه
اشهل المحبه أشما اريد أترك ودادك يصحى بيه
أستاحشت عيني أوصبرتها أتنطري ياعين جيه
جيه لو حتى بحلم وبوحشتي سير عليه
أخ لو شوقك يجيبك مره خل يغفه وي كلماتك حبيبك

بلاي وداع مثل العود من يذبل بلايه وداع
بلايه وداع مثل الماي من ينشف بلايه وداع
تدريني هرش واوجرت بي الكاع
ويارخص العشق من ينشره وينباع

جنت بلليل المحبين شلذ أسمك على الخاطر
وجان الشوق بيك أرسوم حلوه ولهفة أمسافر
وجنت أوياك صبر الكاع للكيض وصبر شاعر
وبلا كلمة التنكال ..كل ذاك الفرح ينشال
وظنون المحبه أتظل بلايه أوداع يارخص العشق من ينشره وينباع

شلون ألماي يقدر ينكر أجروفه ..
شلون العين تقدر شوفها أتعوفه ...
وأبو جفوف الحنينه شلون يرضى تبيعنه جفوفه
وبلا كلمة التنكال.. كل ذاك الحنين أنشال
وظنون المحبه أتظل بلايه وداع
ويا رخص العشق من يتشره وينباع


شمت أجفوفي لقت نفسي جديده
وقلبت وجهي لقت صبري نهر
جاست أجروحي طفح دمي قصيده
وخضرت روحي عراريس وقمر

أتوسدت همي نشغ بيها فرحها
وشرعبت خيطين والدنيه بخت
ضحكت أبوجهي لقت عيني جفنها
وعانقت نوم الصبح واتحلمت
رادت أتلمني لقتني بلا شريعه
استخطرت ظلها وعلى أجفوفي أنجفت
وهات هات الليل يالمالك شغل بالليل هات
وهات هات الكاس يالماتعتلق بالكاس هات
الدنيه المابيتته لغيرك أتلولي وتبات

دللتني أكبر وأشم بجفوف أديها
وذوقتني أسمي وعرق رقبه وخجل
وجانت الروحي سفر بأول محطه
الماصحه جفنه وغفه وفات السفر
جانت أيدي دروبها وفيهه وشمسها
أتفز لون جفي أبخواصرها عثر
قالت الكطع على عشرتها
أبعطشها فرح لو حست بقطرة مطر
وهات هات الليل يالمالك شغل بالليل هات
وهات هات الكاس يالما تعتلق بالكاس هات
الدنيه المـا بيتته لغيرك تلولي وتبـات